¿Por qué nun hai una derecha asturianista?

N’Asturies, tanto na esquierda como na derecha, la conciencia de clas ye muncho más grande que la conciencia nacional o rexonal

Recomendados

Nicolás Bardio
Nicolás Bardio
Es politólogo, escritor y creador de juegos de rol.

A la hora de falar de política asturiana – cosa que, por desgracia, ye cada vuelta más rara, madrileñizaes les conciencies too como tán – una de les entrugues que más se repiten ye ésa: ¿Por qué nun hai una derecha asturianista asturiana?, “¿Ye posible qu’esista?”. Nesta vida práuticamente too ye posible nun planu teóricu o, como se diz, “el papel aguántalo too”. La realidá amuésanos que nun cuayó (¿entá?) nengún proyeutu d’una derecha asturianista nesti país.

Una de les principales razones poles que nun cuayó esta derecha foi la cuestión llingüística. Países como Irlanda o Aragón foron a encadarmar partíos de derecha o centru-derecha propios que tuvieron y tienen una continuidá bien llarga y esprésense la so identidá rexonal/nacional nuna llingua que nun ye la históricamente propia del país: L’inglés nel casu d’Irlanda, l’aragonés nel casu d’Aragón. Estos partíos, armáronse dándo-y munches veces el llombu a la realidá llingüística del país. N’Aragón, el PAR, la derecha rexonalista llocal, nun tien especial interés nin conexón coles llingües propies d’Aragón que, hai que lo recordar, fálense en zones xeográfica y poblacionalmente mui pequeñes, nada que ver col casu asturianu. N’Aragón la llingua materna y propia de la mayor parte del territoriu ye’l castellán y la identidá aragonesa ármase en castellán ensin nengún problema.

Dicir “Viva Asturias” y non “Puxa Asturies” rincha

¿Qué pasa n’Asturies? Qu’esa posición rincha. Pa bien o pa mal, (obviamente pa bien, ta claro), la llingua asturiana entá ta bien viva nel nuesu pueblu y faise bastante “marciano” l’encadarmar un partíu rexonalista o autonomista dándo-y el llombu al asturianu y a la cuestión llingüística, hasta’l puntu de qu’un discursu rexonalista o asturianista nun tien nengún xacíu si dexa pa prau la llingua o si la dexa fuera de la ecuación. ¿Cómo se pue ser “asturianista” y dexar fuera de la ecuación el mayor movimientu políticu asturianu – específicamente asturianu – que ye’l movimientu pola oficialidá de la llingua asturiana? Ye cenciellamente inviable, un poco como reivindicase demócrata y nun se preocupar pol drechu al votu o reivindicase LGTB y nun sofitar el matrimoniu igualitariu. ¿Un exemplu pa ver bien a qué nivel ye “marciano” lo asturianista ensin lo llingüístico? Namás hai que pensar no raro que ye sentir un “¡Viva Asturias!” en cuenta d’un “¡Puxa Asturies!”; tal paez que ye un guiri’l que lo diz y non una persona d’equí. Suena falso, suena impostao, suena a guión de serie mala de televisión española y ye poco creyíble. Pero eso ye namás un “botón de muestra”.

Los intentos más serios qu’hebo de montar un partíu rexonalista o asturianista foron xustamente la URAS y Foro. Nengún de los dos apostó pola llingua porque, pa bien o pa mal (pa mal pa la llingua), les persones qu’apostaron pola llingua asturiana na burguesía (que ye d’onde salen los cuadros de los partíos de dereches), son una minoría mui respetable y digna pero mui minoritaria. L’asturianu ye una llingua con un componente de clas social mui fuerte: Equí nun hebo una renaixença afalada pola burguesía, nin hebo iniciatives privaes como les ikastoles dende les persones con perres pa defender la llingua. Al contrario, l’asturianu tien na so defensa nes últimes décades – y sobre manera nos años 70 y na Transición – a toa una xeneración de fíos de mineros, obreros, xateros y pescadores que van a Uviéu a estudiar.

A la burguesía impórten-y les cuestiones de clase, y éstes cuestiones-yos son más favorables nel marcu español

Al marxe de la cuestión llingüística – que nun ye poca cosa – la burguesía asturiana tien más rellaciones cola madrilana que col propiu país. Nun hai un intentu de competir cola burguesía madrilana – que ye la hexemónica n’España – como sí puede haber pente la burguesía catalana que tien editoriales, llinies aérees, compañíes eléctriques y demás como les que puedan tener los madrilanos. N’Asturies, tanto na esquierda como na derecha, la conciencia de clas ye muncho más grande que la conciencia nacional o rexonal. A la derecha y a la esquierda impórta-yos más la política fiscal española que’l desendolcar una política fiscal específica p’Asturies; impórta-yos más incidir nos mecanismos económicos, sociales y llaborales que se deciden en Madrid que decidilos a nivel d’Asturies. Nel casu de la burguesía asturiana, porque estes cuestiones interésen-y muncho más qu’otres de calter cultural o territorial y porque – nun son tontos – saben que treslladar les decisiones a un marcu asturianu fadría les coses más difíciles pa una derecha que a nivel d’España tien posibilidaes reales de tocar poder (Y de patrimonializalu) y a nivel d’Asturies, cola implantación de la FSA-PSOE, tienlo muncho más difícil.

Mientres nun cambie la composición socilóxica d’Asturies – y tamos falando de cambios lentos que nun paez que vaigan desendolcase, con una población funcionarializao – el marcu políticu asturianu – l’autogobiernu – ye dañín pa la burguesía asturiana porque ye un marcu nel que xueguen en desventaya y a la de perder. Que cuanto más a la derecha más españolista y centralista seyan los partíos y cuanto más a la esquierda más federalistes y descentralizadores seyan nun ye casual n’Asturies; ye, cenciellamente, que caún de los partíos ta resolviendo la cuestión de clas nel ámbitu nel que tien les de ganar: La derecha n’España, la esquierda n’Asturies.

Actualidad

Dejar respuesta

Please enter your comment!
Please enter your name here