Kai C. Torel (Xixón 1995), estudió filoloxía asturiana y ta anguaño faciendo’l master de profesoráu faciendo práutiques nel IES Vallín. Participa nel coru mozu de Xixón. Dientro de la lliteratura, interésa-y sobre manera’l xéneru fantásticu nel que yá tien dellos testos pero ta empezando a publicar agora. Con 27 años, va asoleyar el so primer testu nel próximu númberu de Formientu tien pensao sacar la so primer publicación.
El microrrellatu “Canes” acaba de ser premiáu col primer premiu nel concursu lliterariu «Ensin muyeres, nun hai idiomes» d’Iniciativa pol Asturianu. ¿Ye’l primer premiu que ganes o tienes más?
Magar que participé en dellos concursos lliterarios en castellanu, ye la primer vez, n’efeutu, que gano ún. Y ye tamién la primer vez qu’escribo un microrellatu n’asturianu (nun ye la mio llingua materna, entamé’l so estudiu na universidá), polo que la sorpresa ye, pa min, doble.
El concursu organízalu Iniciativa pol Asturianu. ¿Qué te paez el so llabor de defensa del idioma? ¿Qué pienses que fai falta?
El llabor d’Iniciativa pol Asturianu ye imprescindible. Tamos nuna dómina onde la xente ye cada vez más estremo y tenemos de facer tolo posible pa que nun se pierdan toles conquistes yá algamaes. Poro, organizaciones como esta caltienen la llucha pol cumplimientu de la normativa llingüística del Principáu y pola normalización de la llingua asturiana en toles estayes de la vida social y cultural de la rexón.
Una de les coses que creyo que faen falta ye llegar a la mocedá al traviés de la educación. Por embargu, entovía nun sabría dar una rempuesta concreta a esti problema, anque espero que la futura esperiencia como docente me dea un poco de lluz.
¿Yes socia?
Nun soi socia (entovía), pero prestaríame selo. De xuru dientro pocu tiempu.
¿Ye difícil ser moza y dedicase a la lliteratura?
Ye difícil, en xeneral, dedicase a la lliteratura n’España. Cuando se ye muyer o persona no binaria, esta dificultá faise más visible, sobre too nel terrén de lo fantástico o la ciencia ficción, yá que les nueses hestories queden arrequexaes siempres, independientemente de la nuesa intención, no xuvenil, un xéneru desprestixáu polos “escritores de verdá”, de pocu valir, según quien. Pero tamién atopamos, munches veces, que los nuesos llibros apártense de les principales estanteríes pa ocupar espacios “femeninos” o de temática LGTBIQ+ ensin tener en cuenta’l tema que traten.
La nuesa lliteratura tien de facer frente a una mirada estereotipada que puxa por dexanos al marxe de lo canon y de la “lliteratura seria”.
“Les nueses hestories de fantasía y ciencia ficción queden arrequexaes siempres no xuvenil, independientemente de la nuesa intención”
¿En qué otros proyeutos andes metida?
Nestos momentos nun toi trabayando activamente en nengún proyeutu porque’l Máster del Profesoráu nun me dexa munchu tiempu pa ello, pero tengo delles noveles (dos d’elles yá acabaes) en castellanu que me gustaría espublizar. En cuanto proyeutos futuros, gustaríame escribir más n’asturianu, terminar y empezar otres noveles que yá tengo más o menos pensaes y correxir y traducir unos cuantos rellatos que tengo de va años y ver qué puedo facer con ellos.
¿Qué llibros o escritores foron los que más t’influyeron a la hora d’escribir?
Tengo nidio que les mios influencies más grandes vienen de la mano de dos muyeres a les qu’almiro. Dende pequeña, dexéme llevar pola pluma xuvenil de Laura Gallego García, a la que sigo lleendo y, agora, préstame bucear nes hestories d’Elia Barceló, una muyer a la que-y debo muncho. Tampoco nun puedo dexar de mentar a escritores como Tolkien y Rothfuss, que m’enllenen de esa fantasía que tanto necesito. Los clásicos castellanos son, tamién, una gran influencia pa min. En realidá, tolos llibros que lleo dexen una buelga que se manifiesta d’un mou o otru.
¿Dalgún llibru n’asturianu que consideres indispensable lleer?
Voi ser totalmente sincera: malpenes tengo lleío lliteratura asturiana. Ye ún de los problemes que quiero solucionar anguaño, porque nun pue ser que pretenda escribir noveles n’asturianu ensin lleer les de los demás. Sicasí, de lo poco que lleí, y polo cenciello d’esta obrina y lo cercana que ye, encamiento lleer Güeli. Un llibrín que se llee nuna tarde y que calienta’l corazón.
¿Cómo ves la lliteratura n’asturianu contemporánea?
A pesar de nun tener muncha esperiencia no lliterario, toi al tantu de les nueves obres que se tán asoleyando últimamente. Soi abondo positiva nesti tema y considero que tenemos una gran riestra mozos, mozes y mozeis que van tar na vanguardia, sobre too, de la lliteratura xuvenil n’asturianu. Queda munchu camín por percorrer, pero yá se ve de cerca la caleya.
