Ente tierra, llana, tomates de Bimenes –espectaculares-, lluces, sombres y musiquina guapa de Dr. Balkan presentóse la XI edición del Festival Mediu Güeyu na finca de producción agroecolóxica Trébole de Agua, en Camoca (Villaviciosa). Lu Fanjul, una de les impulsores del ciclu, adelantó a pie d’ivernaderu’l pasáu 27 d’agostu dellos de los conteníos que se van poder ver nesta undécima edición, que tien por protagonista al mundu rural. Les proyecciones van facese na parroquia de Lugás, onde cuenten cola collaboración de l’asociación vecinal.
Un desérticu y isleñu mundo rural ye l’escenariu d’ún de los llargos que se van proyectar, Rendir los machos, dirixíu por David Pantaleón. Un viaxe per Fuerteventura de dos hermanos malaveníos y siete machos cabríos ye la sida p’afondar nes rellaciones personales y sociales nun mediu y un mou de vida, el ganaderu, qu’apurre una visión de la isla canaria que ruempe cola hexemonía de la mirada turística sobre’l territoriu. Pantaleón algamó con esti llargu’l premiu a la Meyor Dirección nel Festival de Cine Européu de Sevilla y el premiu al Meyor Film Nacional nel Festival de Cine Independiente de Barcelona l’Alternativa.
Meseta, del director vascu Juan Palacios, ye otru de los llargometraxes que se van proyectar. El documental ufierta una panorámica de la España vaciada al traviés de personaxes del propiu territoriu: un pastor que suaña con viaxar al Titicaca; un güelu que cuenta cases vacies pa dormir; unes neñes a la gueta de pokemons… El llargometraxe vien avaláu por prestixoses distinciones: una mención especial del xuráu nel Festival CPH:Dox (Dinamarca); el premiu al meyor llargometraxe nacional nel Festival de Cine Independiente de Barcelona l’Alternativa, y el premiu del gran xuráu y del xuráu mozu nel Festival de Pesaro (Italia).
Cambiando de temática, nel XI Festival Mediu Güeyu va poder vese’l documental d’animación Historias de Entrepiernas, de la directora Mylene Guiard, que fala sobre’l partu dende una perspectiva crítica y poética. El documental atropó también bien de reconocimientos internacionales, como’l del IDFA (International Documentary Film Festival Amsterdam), el HotDocs (Canadá), el Taiwan International Documentary Festival o el Beijin International Short Film Festival (China).
Escoyeta de curtios y conciertos van completar el XI Festival Mediu Güeyu, que se presenta con cartel de l’artista Bitxo, “Paisana con palomitas y gallina acehando”. No rural y dende lo rural, cultura y música pa la seronda qu’anuncia esti entamu de setiembre.
