La vueltina y el rei Pelayu

Lo que la Vuelta a Asturies podría ser si nun fore lo que ye

Recomendados

Xaime Martínez
Xaime Martínez
Ye filólogu, poeta, músicu y narrador en castellán y n’asturianu.

Alcuando l’Asturies d’anguaño xenera imáxenes peculiares: por exemplu, un ciclista asturianu gana la etapa cabera de la Vuelta a Asturias 2023 y la TPA cúbrelo d’aquella manera. Llámase Pelayo Sánchez Mayo (Teyego, 2000), cuerre nel Burgos BH y ye la so primer victoria como profesional. Nel Twitter del equipu llámenlu «Rei Pelayu».

Al empar, un ciclista xube la cai del Rosal con una bici eléctrica p’apurrir una hamburguesa gourmet repulsiva a una pareya de trentañeros ensin gana de cocinar. Ye de Glovo, pero nun ye globeru. Nel argot ciclista, llámase globeros a los que nun anden mui bien en bici, o a los que se creen más de lo que son y xuben y baxen venti veces L’Altu La Madera na mesma mañana pa demostra-y dalgo a daquién (el qué nun ta claro; o lo peor; ta perfectamente claro).

Quiciabes esti grandonismu del globeru sía quien a esplicar por qué razón la TPA nun cubre en directu la carrera ciclista, ún de los eventos deportivos más importantes d’Asturies y qu’en 2023 quedó arrequexáu a un resume de media hora que da a les 21:30 de la nueche la televisión autonómica y que, sinceramente, nun val pa nada a naide. 

El grandonismu asturianu nun ye otro que la consecuencia sociolóxica d’una falta d’axencia y, paradóxicamente, d’autoestima de los asturianos. Nel llibru que ta pa salir estos díes, Nunca vencida. Una historia de la idea d’Asturies (La Fabriquina) David Guardado Diez esplica cómo’l discursu históricu sobre’l país asturianu construise alredor de la invencibilidá d’esta nueva Xerusalén que ye Asturies, arrodiada per montes sagraos, que sicasí sacrifica la so autonomía pol bien de dalgo mayor (l’estáu español nel 23-F, col estatutu d’autonomía amenorgáu; Fernando VII cuando les cadenes, etc.). 

Si la Vuelta a Asturies se denomina a sigo mesma como la vueltina, failo con un xestu de cariñu. A la fin, ye asina como funcionen los diminutivos n’asturianu: nun marquen tanto’l tamañu como la compasión. Eso sí, que naide de fuera se ría d’ella por mor del sufixu: entós pasa como cuando Camilo José Cela dixo que si la Santina yera piquiñina y galana…

La Vueltina llamase asina, entós, por condescendencia. Podría ser daqué importante, yá que, a fin de cuentes, tien traza d’ello. Equí nun hai namás unos puertos y carreteres perbonos pal ciclismu, nos que, de fechu, un añu tres d’otru tienen llugar les etapes reines de la Vuelta a España, sinón qu’existe tamién una mui notable tradición ciclista que va del Tarangu a Samuel Sánchez pasando per Chechu Rubiera; del CLAS de Rominger a Alicia González yá Iván García Cortina. 

Sicasí, escueyen (¿escoyemos?) ser una vueltina: trés díes que la propia televisión asturiana nun cubre, masque despierta interés acullá de les fronteres de nueso, y a pesar del modelu d’otres vueltes hispániques que funcionen bien, como O gran camiño, la Itzulia, la Volta ao Algarve, la Volta a Catalunya, o Jaen, Paraíso interior. Nun sedría una llocura, de fechu, que la TPA la diere n’asturianu, igual que les televisiones vasca o catalana retransmiten les propies pruebes en euskera o catalán.

Captura de pantalla Twitter Adrián Barbón

Claro que si la TPA cubre la carrera, igual ye pa trayer turismu en masa, como paez que quería nun tuit Adrian Barbón (masque se retractara depués). Asina que meyor dicir, como un ciclista que va a rueda d’otru y nun-y da l’aire y nun pierde munchu tiempu: virxencina, virxencina, que me quede como toi. 

Cola ayuda del Gobiernu del Principáu d'Asturies.

 

Actualidad