Esta semeya qu’equí se ve ye la representación de lo que se podría considerar un Centru Asturianu del sieglu XXI. Una suerte d’antoxana virtual, como dixera Art Zoller en so día, na que podemos xuntanos a güelpe de click toles asturianes y asturianos qu’andamos tremaos pel mundu, y tolos asturianos y asturianes que siguen viviendo n’Asturies. Y tamién, toes y toos aquellos que, ensin ser asturianos, tean venceyaos profesional o artísticamente al ámbitu de l’asturianística. La foto, que tien esi formatu tan poco glamurosu al que nos avezó la pandemia, sacóse’l día 4 de mayu —coincidiendo cola XLIV Selmana de les Lletres Asturianes—, mentes esuchábamos la presentación que daba Alfredo Martínez dende Australia nel marcu de la II Conferencia de l’asociación cultural SAnTINA, la Society for the Analysis of Cultural Topics and Linguistic Identities n’Asturies.
El primer alcuentru d’esta organización tresnacional, ideada a la vera’l Pacíficu cuando’l confinamientu físicu y emocional golpiónos a toes y toos de costa a costa, fora n’abril del 2021, tovía baxo los efeutos d’esi virus que, ente tantes puertes que peslló, y tanta molición que traxo, dexónos abiertos esos furacos de la pantalla del Zoom na qu’agora nos podemos alcontrar. Al deséu que yá teníamos de ver cares, asina fora d’esta manera tan rudimentaria que la teunoloxía nos brinda, sumábase la necesidá que bona parte de la emigración asturiana más recién —la de fines del sieglu XX y principios del XXI— tamién tenía de sacar esa foto de familia que la distancia que nos separa nun nos dexa.
Teo constancia, porque llevo viviendo casi tres décades nos Estaos Xuníos, de que cada poco anecióse pa facer esi retratu, con una pasión que les circunstancies foron tragando a golondrón ensiguida y que dexó proyeutos y ganes ensin continuidá. Al rodiu de la nuesa historia nesti país, de la llingua qu’echamos en falta nesta oriella del Atlánticu, al son de les gaites de Corvera, Llanes o Navia que desfilen pela Quinta Avenida’l día de San Patriciu, ximielgaos casi siempre pola señaldá y dientro d’esi armazón más ampliu de la sociedá de la que tamién somos parte, fixéronse alcuentros onde tol que quixo tuvo convidáu: los estudiantes a los que-ys enseñamos castellanu; los escritores y académicos llatinos colos que trabayamos y convivimos, los descendientes de la comunidá irlandesa que se fai visible cuando llega’l 17 de marzu, y los asturianos, y fíos o ñetos d’asturianos, que periquí habemos. Fíxolo Andrés Villagrá en Pace University en marzu del 2007 y del 2011; fíxilo yo na Spanish Benevolent Society nel 2012 y 2014, y fixéralo yá Alberto Calixto Prieto na Universidá Rollins, d’Orlando, cuando nel 2006, y cola presencia d’algunos políticos llegaos mesmamente d’Asturies pa esta xunta, organizó’l I Symposium sobre la Presencia Asturiana en los Estados Unidos. Nun soi sabedora d’otres iniciatives paecíes dende los años que toi equí —lo cual nun quier dicir que nun les hubiera— pero diéronse proyeutos individuales de gran altor, como los documentales del xixonés Luis Argeo y del profesor de la Universidá de Nueva York (NYU) James Fernández, que lleven tiempu siguiendo’l resclavu de los emigrantes asturianos de principios y metá del sieglu XX nos Estaos Xuníos.
Nun foi d’estrañar que, en cuantes Zoom apaeció pa echanos un gabitu, y les creadores de l’asociación —Covadonga Lamar Prieto, Isabel Álvarez Sancho, Miriam Villazón— foron quien a velu, nos faltara tiempu pa echanos de cabeza unes y otros a les pantalles del ordenador y, ensin más carné de socios que l’enllaz de les plataformes virtuales, nos entusiasmáramos cola idea de participar nesta tertulia tresoceánica. Había demasiaes ganes. Queríamos entendenos fuera d’Asturies, facenos ver, convencenos de que nun yéramos nenguna lleenda y escribir el párrafu inicial d’esi ensayu de la emigración asturiana contemporánea que tovía nun se fixo. L’orixe de l’asociación vieno de la mano d’esa primer conferencia que se fixo n’abril del 2021 y, anque nun hubo espicha pa pone-y el ramu a esta fiesta intelectual y afeutiva, tol mundu quedó contentu a esgaya como pa repetir. Y nos díes 3 y 4 de mayu repitióse, con mayor enfotu tovía que dos años antes.
La situación, de toles maneres, ye tan complicada como imprevisible, porque los escenarios cibernéticos que nos agospien, pese a les munchísimes posibilidaes qu’en realidá nos ufierten, vienen acompañaos a la vez d’una dosis importante de fraxilidá. En cuanto s’echa la calavía a la plataforma correspondiente espués de los alcuentros virtuales, topámonos de vuelta nesa xeografía diaria que poco tien que ver coles nueses rutes del corazón y col diseñu d’esa ciudá sentimental que nos emburria a trabayar xuntos los que tan dixebraos tamos.
Supongo que falo un poco dende’l mieu y dende una especie de rocea preventiva, esa actitú abondo asturiana d’abrir el paragües enantes de que se ponga a esbastiar, pero reconozo que nos toca probar nuevos modelos, abrir puertes que nunca hasta agora s’abrieran, caleyar per onde nunca naide pasó y pensanos como una comunidá que sepa xuntar les vivencies de los que nos fuimos y tuviemos que navegar n’otres agües nes que la identidá asturiana tamién ye posible, y les de los que-ys tocó quedase y son capaces d’entender que lo asturiano puede tar más allá de Payares o de Santiagu’l Monte. Y que si hai país, como diz agora Xuan Cándano que sí lu hai, a esi país tamién-y damos forma los que lu facemos dende les munches otres cartografíes que nos abluguen pero, sobre too, dende esi mapa emocional que s’acaba quedando nel mesmu sitiu.
Conxuraes asina les rocees, nun teo más que desear que Zoom siga esistiendo, que la voluntá nun falte, y que la foto de familia vaya xorreciendo a un llau y a los otros llaos de la mesma Asturies. Y que cuando-ys toque facer el retratu a los que se quedaron na tierra de la que toes y toos venimos, que s’alcuerden de mover la cámara lo que sía que se tenga que mover y nos metan tamién a los que vivimos allalantrón. Nun vaya paecer que quedamos fuera.
