El xéneru del ensayu nació yá como dalgo híbrido, mestizo, cuasi indeterminao: nel sieglu XVI, Michel de Montaigne emplegó per primera vegada esta etiqueta pa referise a la so escritura fragmentaria, fecha como una «marquetería mal xunida», con un desorde que paradóxicamente concedía una gran llibertá al escritor.
De magar esi momentu, l’ensayu convirtióse nuna de les principales maneres de pensar lliterariamente na cultura europea, como demostraron otros cultivadores del xéneru como Blaise Pascal o Benito Feijoo. Influyó na conformación de campos tan estremaos como’l periodismu, la ciencia o la educación: asina, les pieces periodístiques coles que Addison y Steele contribuyeron a primeros del XVIII nel diariu The Spectator llamáronse, significativamente, ensayos y, a día de güei, los essays son una parte fundamental de la educación nes escueles y universidaes anglosaxones.
L’estilu relaxáu y flexible de los ensayos, la so capacidá pa facer «ciencia ensin la prueba esplícita» (como dixo Ortega) y la presencia del yo del escritor diéron-y a esti xéneru un papel destacáu na historia de la lliteratura moderna, que s’espande inclusive a otres disciplines artístiques, como’l cine, onde’l xéneru del ensayu cinematográficu tien un pesu bien notable. Poro, nun ye d’estrañar qu’anguaño tenga un pesu importante nel mercáu editorial en toles llingües. Incluyida, claro, l’asturiana.
El papel del ensayu na lliteratura asturiana, por embargu, nun ta tan estudiao como’l d’otres escritures. Les condiciones particulares de la lliteratura na llingua de nueso —que privilexó, pola situación de sustitución llingüística, una poesía comprometida con dicir los nomes de les coses— fixeron que demientres munchos años l’ensayu tuviere un rol subalternu que, nos últimos años, ta entamando a revertise.
Asina, rescampla’l fechu de que hai una tendencia nueva na lliteratura asturiana, que ta mui interesada pol xéneru ensayísticu: los éxitos recientes de Nunca vencida, de David Guardado (2023); No hay país, de Xuan Cándanu (en castellanu, 2022) o 42.553, de Xuan Santori (2017) falen por sigo mesmos, y el xéneru fixo nos años caberos por espandise hacia otres modalidaes, como amuesen obres como El país del silenciu (Vanessa Gutiérrez y Beatriz Redondo Viado) o los diarios de rodaxe/ensayos de Ramón Lluís Bande espublizaos na editorial Impronta.
Pero ¿d’ónde sal esta nueva corriente? ¿Y cuálos son los finxos históricos que conducen a ella?
Del bable al asturianu
Como aprecierá cualesquier llector que s’avere a la historia de la lliteratura n’asturianu, la diglosia fixo una parte imprescindible d’ella. Demientres munchos años, los poemes podíen escribise n’asturianu, pero los paratestos (títulos, comentarios, etc.) diben en castellanu, porque l’asturianu bien podía valir pa les emociones, pero non pal pensamientu.
En consecuencia, paez esperable qu’un xéneru como l’ensayu tardare n’aportar a la lliteratura de nueso: asina, acordies cola escritora y editora Esther Prieto, el primer finxu na so historia que paga la pena señalar nun apruz hasta Llingua y sociedá asturiana (1976), de Xosé Lluís García Arias. Esti ensayu, precursor de la sociollingüística asturiana, abriría un camín que nos años siguientes diba percorrer muncha xente.
Nos años 90 tien llugar un primer esporpolle notable del ensayu n’asturianu, cuando se xunten dos factores: d’una mano, la implantación definitiva d’un asturianismu políticu y social na sociedá, que yá taba pasín ente pasu más alfabetizada n’asturianu; de la otra, la creación per parte de la Conseyería de Cultura del premiu d’ensayu Máximo Fuertes Acevedo en 1992.
Mesmo la escritora Laura Marcos que’l ensayista David Guardado señalen a NORTES esti últimu fechu: la dependencia absoluta del ensayu asturianu del premiu Fuertes Acevedo. Acordies con Guardado, esto nun ye necesariamente malo: «gracies al premiu hai una producción curiosa n’asturianu».
Una güeyada al palmarés del gallardón amuesa, efectivamente, que gran parte de los grandes ensayos n’asturianu foron premiaos, pero tamién qu’hai güecos bien curiosos nesti premiu (ediciones en que se declaró desiertu) que revelen el cultivu escasu del xéneru a lo llargo de munchos años: según Guardado, la «producción escrita n’asturianu centróse munchos años na lliteratura de ficción y l’ensayu quedó de llau durante toos estos años, y agora hai una revitalización del xéneru. Cuestiones como lo que fai Damián Barreiro (pensamiento sobre Asturies n’asturianu) ye lo más frecuente, y espero que nos próximos años veamos más». De fechu, otru de los premios d’ensayu más notables n’asturianu desapaeció seique pola falta de propuestes, el Fierro-Botas, creáu pol conceyu de Xixón en 2007.
Sicasí, munchos de los llibros que marquen la historia del ensayu asturianu escríbense nos años 90: en 1992 lleva’l Fuertes Acevedo Vistes lliteraries, de Milio Rodríguez Cueto, que según Laura Marcos hai que rescatar «pola clarividencia y la opinión tan personal y independiente, y por esi papel de versu sueltu que fai Rodríguez Cueto dientro de la lliteratura asturiana. Nunca calló lo que pensó y nótase que pensó muncho y a fondu, dende una perspectiva propia».
Arriendes d’ello, en 1997 apaez Llingua y xuiciu, de Ramón d’Andrés, que pa Laura Marcos ye «ún de los primeros ensayos, que foi mui ampliamente difundíu y que venía a facer esi papel pedagóxicu, y que tuvo una difusión tan grande que depués espublizóse en castellanu y agotó la primer edición. Foi mui lleida y mui celebrada, y mui emplegada depués nel ámbitu didácticu».
Per otru llau, como se remembrará, Esther Prieto consideraba como obra fundacional del ensayu lliterariu n’asturianu la obra yá vista de Garcia Arias, pero tamién Del centru a la periferia (1993), de Consuelo Vega y Antón García. El motivu sedría «porque entrambos y dos fueron quien a abrir debate, anque namás fuera ente l’asturianismu y pue ser que tamién ente xente ayeno a la defensa del asturianu y a da-y al públicu una visión dende otra perspectiva de la llingua asturiana y de la propia Asturies».
A partir d’esi momentu produzse un lentu espollete del ensayu, y nun ye hasta 2018 que se percibe que’l xéneru alquier un pesu notable dientro del sistema lliterariu asturianu: ye entós cuando s’espubliza’l yá mencionáu 42.553. Depués de Buchenwald, de Xuan Santori, que llevó’l Fuertes Acevedo l’añu anterior, y esti premiu entama a recibir una cantidá bien granible de propuestes, hasta’l puntu de que munches queden ensin espublizar al actuar el premiu cuasi como un embudu.
Según Esther Prieto, que foi la editora del llibru de Santori, esti foi un fitu importante porque «foi a llegar a un públicu bien grande, como se pudo ver na presentación nel Muséu Arqueolóxicu. Pero, amás d’ello, creó opinión ya que, sin dir más p’allá, el protagonista del ensayu, l’astur-francés Vincent García Riestra, pudo volver a la tierra de la que lu espulsó la Guerra Civil y el fascismu y recibir homenxes públicos, amás de la Medalla del principáu d’Asturies».
Dase amás la circunstancia que esti llibru, del que se sacó una versión en castellanu,
trunfó n’asturianu: según la responsable de la editorial Trabe, «tol mundu pregunta por él n’asturianu y nun lu quier en castellanu (tamos iguando una edición nueva ampliada; por supuestu n’asturianu)».
Asina, agora hai una oferta mui curiosa d’ensayos n’asturianu, como los de Damián Barreiro sobre cultura pop y audiovisual, los ensayos más poéticos de José Ángel Gayol o los yá mencionaos del propiu David Guardado y Xuan Cándano, que tienen unes cantidaes de llectores que demuestren un gran interés del públicu por esti xéneru y polos temes que trata.
Calter del ensayu asturianu
Les característiques del ensayu n’asturianu, asina, son mui particulares y tán venceyaes, en gran midida, cola propia historia del xéneru. De mano, cabe señalar el gran apegu del ensayu pol ámbitu del país y la so cultura. Según Laura Marcos, «ye normal que la llingua propia s’use pa falar del país. Podría usase pa otres coses, pero nel estáu d’espoxigue nel que tamos ye normal».
L’ensayu n’asturianu, d’esti mou, presenta un calter que comparte hasta daqué puntu col restu de la lliteratura asturiana: según Esther Prieto, ye «erráticu, malapenes ensin canales d’edición y de difusión y con unes llendes tovía non mui definíes». De fechu, como remembra la escritora y editora de Trabe «quitante la llinia abierta del Máximo Fuertes Acevedo, namás la colección Batura de Trabe da agospiu a esti tipu d’obres: Notes de lliteratura asturiana de Marta Mori acueye dellos artículos ensayísticos y tenemos en cartera obra de la estudiosa de la lliteratura asturiana Pilar Fernández».
D’otra manera, como asocede con otros xéneros como la novela —que tien a una muyer como primera cultivadora del xéneru n’asturianu, Enriqueta González Rubín—, la escritura fecha por muyeres tien un papel especialmente notable en comparanza con otres lliteratures peninsulares: Laura Marcos señala que l’ensayu Yá cuasi nunca lo facemos por amor. Conciencies mercenaries (2013), de Beatriz Redondo Viado, foi’l primer ganador del premiu Fuertes Acevedo escritu por una muyer.
Acordies con Marcos, «ye de los pocos que ye independiente de lo que ye la cultura asturiana: ye de pensamientu contemporaneu en cualesquier llingua. Ye una cosa mui sui generis. Ye particular por too, porque lo escribió una muyer, porque nun tien marques d’asturianía, y porque lu espublizó KRK, non una de les editoriales típiques qu’editen n’asturianu. Nun sé cuála d’estes categoríes ye la que fai que sía tan difícil d’atopar agora y tan poco referenciáu».
Nesti mesmu sen, Esther Prieto considera que «ye de solliñar la presencia d’autores nel ensayu asturianu, quiciás en una proporción más grande que n’otros xéneros: Una mirada a la muyer na historia, de Consuelo Vega Díaz (1999); Yá cuasi nunca nun lo facemos por amor. Conciencies mercenaries, de Beatriz R. Viado y El paisaxe nuestru, de Vanessa Gutiérrez (2016). Y esta pue que sía otra de les característiques del ensayu asturianu».
Finalmente, un rasgu menos positivu del ensayu que s’escribe anguaño n’asturianu ye la confusión qu’existe ente l’ensayu per se y los trabayos d’investigación de tema humanísticu. Anque ye evidente que nos últimos años tán escribiéndose munchos más ensayos, como atestiguen el premiu Fuertes Acevedo o la propia actividá editorial del sistema lliterariu, tamién ye verdá que la llende ente ensayu y trabayu académicu nun queda esclariada dafechu, pues el valor estéticu (lliterariu) del ensayu nun ye a les veces tan fácil de percibir.
Anque esta confusión nun ye mui comprensible si se parte de la perspectiva histórica de Montaigne, Feijoo y demás, ello ye que’l casu particular d’Asturies fai qu’estos dos xéneros s’entemezan: según Laura Marcos, nun ye raro ver trabayos con más apariencia de TFG (trabayos de fin de grau) que se quieren facer pasar como ensayos, col riesgu de qu’estos testos nun topen la canal afayadiza pa la so publicación y acaben quedando escaecíos en caxón, no que coincide con Esther Prieto.
Por suerte, hai víes estremaes pa la difusión d’un y otru xéneru: amás del Fuertes Acevedo existen, acullá del mundu estrictamente académico, gallardones como’l Premiu Yolanda Huergo pa trabayos d’investigación n’asturianu, qu’entama l’Asociación Grana, que permiten estremar bien ún y l’otru.
