“¡Hasta luego, tabernera!”, me dixo una moza al marchar. Parecióme sexi y entrañable: taberna, galerna, acelga, caverna…, toes elles perpertinentes palabres de película clásica. Prestóme una montonera que me mandaren talu vocablu al escurecerín dende l’otru llau de la barra del chigre so l’horru en Rozaes (Villaviciosa), parroquia qu’acoyó, un añu más, la XVI edición del Festival Mediu Güeyu los díes 24 y 25 d’ochobre.
Yo’l vienres nun fui al Mediu Güeyu, pero’l el sábadu sí. Lo que sé del vienres ye qu’hubo munchos premios, toos mui merecíos: “Yo la niebla y tú el camino”, de Galgo, dirixíu por Pelayo Zurrón y Javier Bejarano, foi’l ganador de la nueche nes categoríes Meyor Vidiuclip, Fotografía y Montaxe, asina que llevó los 500 eurinos y la codiciada escultura de Pablo Maojo. “Una proposición decente”, de Pablo und Destruktion, fíxose col Meyor Cantar; “Fantasía”, de O Rabelo y Meiga-i, dirixíu por Iris Justo, tuvo’l reconocimientu al Meyor Vestuariu, y “Es una porrera”, de las Barbie Túricas, dirixíu por Eloy Couceiro, llevó’l Premiu del Públicu. Toa esta xente que ganó accésits llevó pa casa un gran honor y obra perguapa del artesanu de la madera, Brese.
Ente medies, sintióse nun sé qué d’un tongo, pero yera broma. Amás, La xente rellumaba en brilli brilli y Txus, pasu ente pasu, foi ganando al públicu. Hubo repollos y lombardes d’Alba G, literal, nel fotocol. Janire y Azaila liáronla parda na gala (nun son palabres testuales, pero sábese que tan altamente cualificaes pa ello). Hubo un docu sobre Los Maniseros, y esposiciones de fotos d’Ana Laguarta, Hija del vendaval, y un mural de fotos del pueblu cola collaboración del vecindariu de Rozaes y Luis Sevilla. Esi mesmu vecindariu, el sábadu, taba nes escueles dando un taller de mazcaraos, al ser Rozaes pueblu de tradición y sapiencia nel noble arte d’antroxar.
Depués el sábado nun vi nenguna peli. Sí sentí perequí y perellí que “mui guais”. Antón quedó encantáu colos curtios y el docu Ainda Maruxa, de María Romero García, y Paula disfrutó una montonera con Historias del buen valle, de Jose Luis Guerín, qu’ellí tuvo depués en vidiollamada: “Había un paisanu que facía asina…”, cuntaba Paula alegre nuna almirable muestra de flexibilidá. Salió la xente percontento a cenar depués d’El Mohicano de Frédéric Farruci –ún de Tinéu dixo “flipéi” y calificólu de “peliculón”-, col que tuvieren de charla y que vieno dende Biarritz a Rozaes per eses carreteres de Dios. La organización del Mediu Güeyu nun escatimó en callos pa la cena de traxe: “A quién nun-y gusten los callos”, dalguién pensó.
El conciertu de Pablo und Destruktion más o menos sentílu, pero llegué un poco tarde a cuenta’l café y hubi abandonar enantes. “Hipócritas”; “destrucción”; “soy una persona tóxica, laralaralaaa, ¡todos juntos!”; “ese mar que ves tan bello es un traidor”; “de la jodida expansión del universo (me arrepiento)”. Sería’l mood, sería l’ambiente, sería la música, sería’l léxicu, sería la mestura; disfrutélo. Había fans mui fans del artista y munchu públicu y yo tamién quería gastar un abrigu sobriu.
La mio atolondrada partida foi a cuenta de que Txus o xugaba al mus o marchaba. Nun lo permitimos. Fuimos de pareya y Lu con Rulo. Van fuerte esa xente: envites a cinco, chavales. A mi eso un poco de mieu dábame, la verdá, que yo nun soi de ver tanto y, ente eso, que Lu me tien calada, y les míseres cartes que Txus aveza a recibir, perdiemos.
Fui pa la barra con Pata, que neso quedara, y la xente pidía cerveza, sidra, zumo, agua. Andaben buscando asentamientu pa xintar la paella qu’una vecina de Rozaes preparó –de postre tarta de mazana– y perehí s’espardió’l xentíu. Riquisísimo. Depués, andaben Jola y un rapaz que parecía mui bona xente y al que nun pregunté’l nome, torpe social que soi, faciendo café ensin aparar, pero yera más la demanda que la ufierta.
Atoréme y too, porque primero tenía llista d’espera y depués nun tenía zucre. Enseguidina nos lo traxo de so casa un vecín. El casu ye que nun quería yo engañar a naide col orde de la llista d’espera nin que naide se punxera fadiu y, como se diz agora, al final fluyó. La xente, amable y comprensivo, esperando y desfilando satisfecho colos sos cafés. Llechi namás qu’había d’avena.
Eché la tarde con Pata, panchu chigreru, Tilo, María, Ana… Falamos lo típico, del tinder, l’arte y eso. Depués vieno más xente. Venía y marchaba, un guapu trasiegu. La xente del pueblu de Rozaes vieno a les pelis cuando pudo, porque tamos n’añu de mazana y hai que lo pañar. Dicen qu’esti añu la cosecha va ser el doble d’otros, figuráivos. Ente uno y otro, un momentín toparon pa pasar perehí.
Echamos un bon ratu con Loli, anfitriona del horru y la cuadra onde asocedió tan sonáu festivalín. Traxo garrafes d’agua a mamplén y cuntónos del famosu cantar de la Nueche d’Ánimes de Rozaes: n’otros tiempos, un cortexu de mozos amedranaba’l pueblu con mortuoria y famosa letanía enantes de zarrar el chigre, como bien ordena’l protocolu de la Santa Compaña. Amás, supiemos nesa charla de l’acertada adaptación al asturianu de Dulia del foriatu términu del, enantes, Día de Difuntos: “Xalogüín”. Hai que lo patentar pero yá.
Vinieron Laura, cola que recordé otros tiempos, Sandra, Mónica púnxome al día, un señor perdió les gafes, pero nun supi más, espero que les alcontrara, y Eloy andaba cola cámara. Filosofé un ratín con él a cuenta de la idea de progresu y depués col Suárez de Noreña y la dialéctica. Con Lu reflexoné sobre coses de la vida y los viaxes espaciu/tiempu. Xurde diba y venía y nun lu perdí de vista, qu’amás d’amiguín, quedara n’averame a los mios dominios, como cortésmente fixo. Mentanto tocaren La Morgue, pinchó la DJ Flama Rosa y, a xuiciu del personal de barra, sonaba bárbaro.
Vieno más xente. Que yo conociera, Laura Marcos, Inés, Casandra o Alberto Arce, por poner un casu; y tamién Carmen la de Bimenes, que paramos en Casa Eladia al prevermú con ella, y Emil y Patri, Sara, Juan, y munches más persones con nomes que yo desconocía. Parezme qu’al vermú vermú había xente famosuco d’Asturies, d’Uviéu y Xixón, yá m’entendéis, y lo normal, xente en paro; xente que nun quier trabayar pero trabaya; xente con secretos d’anteanueche; xente cansao; xente con dalgún problema del que nun faló; xente que duldó con si dir a lo de Palestina; xente que nun reservara la paella; xente a la que, nun se por qué, convencieron pa dir; xente que s’apunta a un terciu (esta espresión copié-yla a Loli, por si la necesitaba).
Pasar, pasaron más coses. Tol ratu. Namás doi concisa cuenta de lo que vi y me cuntaron. Ah, hubo un insectu nun vasu de kas de llimón que llantaron enriba d’una miniplataforma de lluces de colores y muncha xente s’esmoleció por él (pol insectu). Quiero recordar que foi ¿Lu? ¿Ana?… Dalguién-y aplicó delicaos cuidaos paliativos de rehabilitación d’ales. Cuento con que recuperara y vuelva l’añu qu’entra. L’insectu, pareciendo de la familia de les caparines, nun lo yera: les ales yeren estreches como de mosca, pero más llargues, y el troncu tamién, como de poliya de lluz. Por si lu veis.
