Conecta con nosotras

Reportajes

Un día d’Asturies ensin bandera

La celebración del 8 de setiembre,
tien como protagonista principal la misa de la Santina y la homilía del arzobispu

Día d´Asturies. Semeya: Gobiernu del Principau d´Asturies.

El 16 de xunetu del 2020 ye un día que va entrar na intrahistoria española de los actos oficiales: el Gobiernu central entamó la primer ceremonia aconfesional de la historia d’España, lo que frañó con décades d’identificación -y confusión- ente Estáu y Ilesia. Énte actos anteriores, como los funerales d’Estáu na Catedral de L’Almudena, onde’l protagonismu llevólu un arzobispu, nel homenaxe d’Estáu a les víctimes de la Covid-19 tomaron la palabra’l Rei -como xefe d’un Estáu basáu na monarquía parllamentaria-, los familiares de les víctimes y los sanitarios. Otru aspectu clave foi la presencia de los presidentes y les banderes de toles comunidades autónomes, amás del usu de toles llingües oficiales. Castellanu, catalán, vascu y gallegu pudieron sentise, xunto inglés y frances, nos momentos claves de la ceremonia. Quedó fuera l’asturianu al nun ser una llingua oficial.

Semeya: Twitter.

Sicasí, esta llingua sí que tuvo presencia n’otru actu d’homenaxe. Foi’l qu’entamó’l Gobiernu d’Asturies nos esteriores del HUCA con ‘El texu de l’alcordanza’. Trátase d’un memorial vivu n’homenaxe a les víctimes asturianes con un actu d’inauguración presidíu por Adrián Barbón y enllenu de chisgos asturianistes. Pa empezar, el monumentu ta formáu por cinco texos, l’árbol sagráu de los ástures que representa’l vínculu d’un pueblu cola tierra y colos que yá nun tán. Otra manera, el nome del monumentu ye billingüe -El tejo de la memoria/El texu de l’alcordanza-. El presidente, que foi’l protagonista d’una ceremonia que visualizó la xestión de la crisis sanitaria na so persona, llegó al actu con una mázcara azul cola cruz de la victoria nuna esquina -ye dicir, la nuestra bandera-. Amás, usó l’asturianu nuna parte del discursu na que fixo alcordanza de los mayores y del respetu a los güelos como seña d’identidá de los asturianos. L’actu acabó cola interpretación a la gaita de la ‘Marcha d’Antón el neñu’ y del himnu. Ye importante parase nel primer tema: la marcha fúnebre tradicional asturiana qu’hasta’l momentu nun s’usara oficialmente como lo que ye fuera d’ámbitos asturianistes.

Primer ceremonia aconfesional de la historia d’España. Semeya: Moncloa.

Foi un actu que nun ocupó tantes páxines de periódicos y minutos d’análisis nes tertulies, pero que tamién marcó un puntu d’inflexón nos actos oficiales entamaos pol Principaú. Foi, nuna tierra tan falta de simbolismos, un marcu distintu depués de décades de gobiernos que refugaron cualquier seña identitaria y, sobre too, depués de dos llexislatures de Javier Fernández, l’home que, por omisión, más fixo por desaniciar la relevancia institucional de la figura presidencial. Precisamente, nel so últimu discursu pol Día d’Asturies, el 8 de setiembre del 2018, Fernández centró les sos palabres en que la identidá asturiana nun destacaba les sos diferencies coles del restu de comunidaes -nuna clara alusión a Cataluña-. Foi’l mesmu añu que la Familia Real visitó’l Santuariu pa conmemorar los centenarios de Cuadonga. Un actu que tamién supunxó’l primeru de la Princesa d’Asturies, Leonor de Borbón, qu’escuchó xunto a la so familia les dos intervenciones que-y dedicó l’arzobispu.

Semeya: Casa Real.

Jesús Sanz Montes faló na Santa Cueva y na homilía na Basílica, polo que se convirtió nel otru protagonista de la xornada, con dos alocuciones dirixíes a emponderar a la Princesa y nes que nun tuvo reparu n’entrar en temes políticos comparando la Reconquista cola respuesta del Estáu al ‘procés’ catalán. L’actu tuvo patrocináu poles empreses Liberbank, EDP y Alsa y emitióse en directo pa toa Asturies al traviés de les pantalles de TPA. El 8 de setiembre del 2018 convirtióse asina nun Día d’Asturies al serviciu del catolicismu y de la corona. Una xornada que quedó erma d’un discursu sobre’l futuru d’Asturies o de celebración de los símbolos comunes que nos conformen como identidá cultural y política. Un Día d’Asturies oficial qu’abrazó’l ‘cuadonguismu’, que refugó l’asturianismu -definíu nel diccionariu como la “defensa o apreciu d’Asturies y la so cultura”- y que dexó fuera de la celebración de la casa común a más de la metá de la sociedá.

N’otros territorios

Nel restu d’autonomíes, el día oficial de la comunidá ye una xornada pa emponderar l’autogobiernu y los elementos comunes como pueblu. Asina, n’Andalucía, enantes del plenu institucional pol 28 de febreru -día que recuerda la celebración del referéndum pola autonomía-, ízase la bandera y interprétase l’himnu de la comunidá nos esteriores del Parllamentu andaluz. Amás, nes escueles entámense actividaes centraes na gastronomía, l’himnu y el traxe tradicional. Otra manera, en Catalunya, el 11 de setiembre, les entidaes y partíos políticos realicen en Barcelona una ofrenda florar nel monumentu a Rafael Casanovas -símbolu del catalanismu al ser la máxima autoridá mentes el sitiu borbónicu a la ciudá-. Amás, la Generalitat y el Parlament entamen un actu institucional qu’en cada edición fai alcordanza de personalidaes y efemérides de la cultura catalana. Con actuaciones musicales, recitales de poesía y un izáu de la bandera catalana que cada añu entrega l’alcalde d’un conceyu al President, l’actu tien un carácter simbólicu de reivindicación de la cultura propia.

En Galicia, la festividá celebrase’l 25 de xunetu, día de Santiago Apóstol. Nel franquismu foi fiesta nacional al ser el patrón d’España. Sicasí, esta xornada ta vinculada históricamente col galleguismu y cola figura de la escritora Rosalía de Castro, símbolu de la identidá gallega. Asina, dende 1932 celébrase na Ilesia de San Domingos de Bonaval, qu’acueye nuna de les sos capiyes el Panteón de Galegos Ilustres, una misa n’honor y una ofrenda florar a l’autora de ‘Cantares gallegos’, que ta ellí enterrada. La homilía celébrase en gallegu dende 1969, momentu nel que se convirtió nel únicu actu públicu nel que se consintió l’usu d’esti idioma. Actualmente, la misa sigue celebrándose y cuenta cola presencia d’autoridaes como los presidentes de la Xunta o de la Real Academia Galega, amás de los rectores de les universidaes del país vecín. Enantes de la homilía, l’Asociación del Traxe Gallegu, acompañaos de los responsables d’organizaciones y instituciones polítiques, faen una ofrenda florar nel panteón, que zarra’l xefe del Executivu gallegu en nome de la Xunta. L’actu acaba cola interpretación del himnu gallegu polos asistentes.

Otra manera, en Castiella y Llión, los actos celébrense cada 23 d’abril na localidá de Villalar de los Comuneros (Valladolid), llugar que foi’l referente de la llucha rexonalista antifranquista. Cola autonomía, convirtióse nel epicentru de los actos políticos y culturales del día comunidá. Asina, nel monolitu n’alcordanza a los Comuneros, cada partíu realiza una ofrenda floral y fai un discursu. Na época na que José María Aznar foi’l presidente autonómicu, la fiesta oficial castellano-llionesa foi itinerante, pero güei la concentración popular en Villalar, entamada pola Xunta de Castiella y Llión, ta consolidada dafechu y llega a superar los 20.000 asistentes.

Per otru llau, Cantabria nun tien un día oficial como tal, anque lo más asemeyao ye’l Día de les Instituciones, festivu na comunidá y que se celebra en Puente de San Miguel cada 28 de xunetu. La efeméride conmemora la constitución en 1778 de la provincia de Cantabria na Casa de Xuntes, edificiu qu’acueye la celebración. La ceremonia empieza un día enantes colos actos más municipalistes. Asina, prodúzse’l nomamientu d’una persona o colectivu destacáu pola defensa y promoción de Cantabria como Merinu Mayor de los Nueve Valles y el presidente del Parllamentu rexonal entrega la bandera oficial de la comunidá al alcalde de la localidá. Un día depués, realízase un actu oficial nos esteriores del edificiu qu’inclúi discursos políticos d’afirmación rexonalista, un desfile de los traxes tradicionales de toles comarques cántabres, l’izáu de la bandera oficial y una representación histórica de los fechos que se conmemoren. L’actu acaba col discursu del presidente autonómicu y la interpretación del himnu de Cantabria. Otra manera, esi mesmu día, Santander acueye un gran desfile de grupos folclóricos entamáu pol Gobiernu y delles asociaciones de folclore.

25 de xullo. Semeya: Xunta de Galicia.

El 8-S del Principáu

Les celebraciones del Día d’Asturies vienen del tiempu de la Transición. Sicasí, nun foi un 8 de setiembre, sinón un 25 de mayu -en conmemoración de la declaración de soberanía de la Xunta Xeneral de 1808-, cuando organizaciones culturales asturianistes, como Conceyu Bable, celebraron el Día d’Asturies n’Uviéu. La primer vez foi en 1978 con ofrendes florales, nesti casu de lloréu, na Xunta Xeneral y na Sala Capitular de la Catedral. Amás, Mieres acoyó un festival cultural. Sicasí, en 1980, un decretu del Conseyu Rexonal d’Asturies, l’órganu preautonómicu, instituyó’l 8 de setiembre como Día d’Asturies. La primer celebración oficial foi en Cangues d’Onís -primer capital del Reinu-. Nesi momentu, el presidente Rafael Fernández y l’arzobispu Gabino Díaz Merchán, llegaron a un pactu pa celebrar el día oficial de la comunidá nesa fecha y convertila nuna imaxe pa la reconciliación ente les dos Asturies: el presidente, símbolu de la continuidá histórica ente l’Asturies republicana y l’autonómica, foi a la misa en Cuadonga y arrodiyóse ente la Santina. Depués, pela tarde, Díaz Merchán foi al actu institucional en Cangues y presidiólu xunto a Rafael Fernández.

Depués vinieron Xixón y Avilés. Nesta última ciudá, l’actu institucional celebróse na Ilesia vieya de Sabugo y acoyó pela primer vez nuna xunta oficial entamada pol Principáu un discursu en llingua asturiana. Foi en boca de Josefina Martínez como miembru de l’Academia de la Llingua Asturiana, que tomó la palabra nel actu enantes del alcalde de la ciudá, Manuel Ponga, y del presidente Rafael Fernández. Cola aprobación del Estatutu d’Autonomía, la llei 5/1984 del 28 de xunu instituyó esa fecha y una celebración itinerante nuna localidá determinada pol Conseyu de Gobiernu. Otra manera, la Xunta Xeneral punxo en marcha en 1984 una comisión parllamentaria que dictaminó que’l Día de la Santina yera’l más afayadizu pa celebrar la festividá. Amás, proponía una rotación de llugares del Oriente como escenariu de celebración, ensin perxuiciu de que se centrara “na zona de Cangues d’Onís”. Per otru llau, recoyía que los actos institucionales tendríen de ser compatibles colos actos relixosos nel Santuariu de Cuadonga.

Gabino Díaz Merchán con Rafael Fernández.

Con too, más allá del actu de les Medayes d’Asturies -que s’entregaron pela primer vez en 1986 y con una primer insinia d’oru que foi pa Felipe de Borbón y Grecia- y el plenu institucional con calter estraordinariu de la Xunta Xeneral -que s’aprobó pola Xunta de Portavoces el 5 de setiembre de 1988-, el Gobiernu asturianu nun fai nengún actu institucional oficial. La celebración llíndase a mercaos tradiciones, prebas de sidra y actuaciones de música asturiana nel llugar escoyíu pol Conseyu de Gobiernu, que namás repitió en Cangues en 1994.

¿El futuru?

El Gobiernu d’Asturies yá anunció que, por mor de la crisis sanitaria, prepara una celebración del 8 de setiembre distinta a la d’años anteriores. El presidente Barbón dexó cayer qu’esta podría tomar como base l’homenaxe institucional a los finaos pol coronavirus celebráu nel ‘Texu de l’Alcordanza’. A eso hai qu’añadir que l’Executivu cuenta celebrar nel 2022 el XIII Centenario de la Batalla de Cuadonga. Según les palabres de la conseyera de Cultura Berta Piñán, la conmemoración quier valir pa facer una reflexón ideolóxica del llugar como guañu de la nación española y pa falar del surdimientu de la identidá propia d’Asturies.

Ensin dulda, estos dos fechos puen xenerar un puntu d’inflexón nunos actos del Día d’Asturies onde’l protagonismu principal ye pa un representante de la Ilesia. Una realidá que xeneró situaciones como la del añu pasáu, cuando Barbón acudió a la misa de Cuadonga y tuvo qu’escuchar como l’Arzobispu cargaba contra’l feminismu como causante del albuertu nuna homilía que s’emitió en directo pela RTPA pa toa Asturies. Nun foi hasta hores depués, en Cabrables -qu’acoyía esi añu los actos del Principáu- cuando’l presidente respondió a Sanz Montes nunes declaraciones na cai. Ellí, depués de reivindicar la cultura y la llingua d’esta tierra, defendió una “Asturies feminista” onde coyién “tou tipu de families”. Una Asturies que, pel momentu, nun tien nengún actu oficial que la empondere nel so día grande.

Damián Barreiro
Escrito por

Haz click para comentar

Responder

Tu dirección de correo electrónico no será publicada. Los campos obligatorios están marcados con *

Lo más leído

Cachondeo en las redes con el “carril bici” de Canteli

Actualidad

¿Dónde están los empleos de la transición energética?

Actualidad

“La educación no es una prioridad para el gobierno de Canteli”

Entrevistas

“¡Abre un puto libro!”

Cultura

Asociación Cultural Nortes de Asturias © 2020 · Centradas en la periferia

Nortes en redes