Llan de Cubel, un estrañu na televisión asturiana

Recomendados

Paco Álvarez
Paco Álvarez
Periodista, escritor y traductor lliterariu d'italianu. Ye autor de les noveles "Lluvia d'agostu" (Hoja de Lata, 2016) y "Los xardinos de la lluna" (Trabe, 2020), coles que ganó en dos ocasiones el Premiu Xosefa Xovellanos.

Hai un cantar, el que da títulu al elepé que la banda orixinaria de Cuideiru y d’Uviéu publicó va cuasi trenta años (‘L’otru llau de la mar’, editáu pol sellu Fonoastur), que cunta la historia d’un marineru enfermu de señaldá pola vida que dexó atrás, naquel puertu llonxanu de Xixón. L’estribillu y el remate del tema diz: «A la fin habrás recordar qu’en toles tierres yes estranxeru menos na d’esti llau de la mar».

Llan de Cubel trunfó en toles tierres ente la oriella del Cantábricu y la mar d’Irlanda: ye’l grupu más nomáu, más internacional y más talentosu de la historia del folk n’asturianu… anque, hai que dicilo, poco xenerosu col so talentu, porque nos dexó esperando venti años pol so quintu discu, ‘La lluz encesa’, publicáu en 2019 y que, por mor del andanciu y del llimbu de formatu y de soporte nel que nala la música anguaño, nun tuvo’l reconocimientu que merez.

Nos años ochenta y noventa Llan de Cubel dio un emburrión decisivu pa dignificar la música y la llingua asturianes nesi camín que, por desgracia, han de percorrer tovía munches y munchos creadores nesta tierra: ganando primero l’aplausu en Madrid, n’Europa y nel mundu pa poder recibir dempués n’Asturies les migayes d’un aplausu cuasi siempre tebiu y escasu (esi síndrome, esi estigma que tien munchos nomes, provincianismu ye ún d’ellos).

Yo viví dalgunos de los momentos más gayoleros de la mio vida sintiendo, nel directu de los conciertos o nel soníu enllatao nos casetes, nos discos de vinilu o nes visites a YouTube, el soníu irrepetible de vientu, cuerda y percusión ‘made in Asturies’ que llabró Llan de Cubel, eses lletres que nos faen esguilar coles uñes y cola dignidá los peñascos siguiendo la ruta de llibertá del ayerán que perdió la guerra y que nos faen fantasiar ente les foles de la mar cola diosa pagana de La Deva.

Esti sábadu pasáu TPA ofendiónos emitiendo un programa despacháu con una chambonería impropia de la radiotelevisión pública

Quienes llevamos trenta y munchos años siguiéndolos amplifiquemos la música, el ruíu y el silenciu qu’arrodia a la banda. Amplificamos tamién les ofenses. Y esti sábadu pasáu TPA ofendiónos emitiendo un programa despacháu con una chambonería impropia de la radiotelevisión pública asturiana. La propia banda nun tardó en sacar nes redes sociales un comunicáu, unviáu al director xeneral de la televisión, nel que llamenta la «falta de rigor y calidá» y nel qu’esixe, más qu’otra cosa, respetu a la so trayectoria.

De xuru que la oficialidá del asturianu, qu’ha de llegar ceo, nun va ser la panacea, pero ha de valir pa iguar coses como estes: ún de los meyores esportadores de la música y la llingua asturianes nun puede sentise estrañu na radiotelevisión pública asturiana. Si llega esi día de la oficialidá, tola xente que falamos, baillamos, cantamos, escribimos, aldericamos o pensamos nesti llingua que sigue queriendo volver al puertu, quiciás sintamos, por fin, que l’acentu col qu’interpretamos la vida ye un acentu natural y aceptable non solo nel mundu sinon tamién n’Asturies.

- Publicidad -

Actualidad

Dejar respuesta

Please enter your comment!
Please enter your name here